<< ئۆزلۈك ۋە كىملىك >> كىتابىدىكى ۋارىس ئەپەندى ھەققىدىكى ئۇزۇندىلەر

كومپىيۇتېر ۋە كومپىيۇتېر ئىشلەتكۈچىلەرگە پايدىلىق بولغان ئۇچۇر ماتېرىياللار يوللىنىدۇ ۋە تونۇشتۇرىلىدۇ.
ئىنكاس يوللاش [phpBB Debug] PHP Warning: in file [ROOT]/vendor/twig/twig/lib/Twig/Extension/Core.php on line 1275: count(): Parameter must be an array or an object that implements Countable
TwoSak
يازمىلار: 26
تىزىملانغان ۋاقتى: چارشەنبە ئاپرىل 04, 2007 10:44 am
ئالاقىلىشىش:

<< ئۆزلۈك ۋە كىملىك >> كىتابىدىكى ۋارى

يازما يوللاش تەرىپىدىن يوللانغان TwoSak » شەنبە يانۋار 05, 2008 12:54 pm

ukij جەمئىيىتىنىڭكى ئالدىنقى نوۋەتلىك رەئىسى ۋارىس جانباز ئەپەندىنى بۇ تور پونكىتىغا ئەزا بولۇپ كىرگەن ھەر قانداق كىشى بىلىمىز . ۋارىس جانباز ئەپەندى ھەققدىكى سۆھبەتتە ئوزى توغرىسىدا بىر قىسىم چۇشەنچىلەرنى بەرگەن . تۇۋەندە مەن ئەسەت سۇلايمان ئەپەندى يازغان ، كوپ خىل ئەدەبىيات مۇكاپاتىغا ئىرىشكەن << ئۆزلۈك ۋە كىملىك >> كىتابىدىكى ۋارىس جانباز ئەپەندى توغرىسىدىكى بىر قىسىم ئۇزۇندىلەرنى تورداشلارغا سۇنماقچى . بۇ ئۇزۇندىلەر كىتابنىڭكى يىگىرمە تۆتىنچى بابى بولغان '' پارىژغا بېرىش : فرانسىيىگە نىمە بولدى ؟ '' دىن ئىلىنغان :
...
مەن بېلەتنى زاكاز قىلىپ بولۇپلا پارىژدا دوكتورلۇق ئىلمىي ئۇنۋانى ئۈچۈن ئوقۇۋاتقان ئۇيغۇر يىگىت ۋارىسقا خەت يازدىم . ۋارىس شىنجاڭ ئۇنىۋېرسىتېتىنىڭ كومپيۇتېر ئىلمى ئىنستىتۇتىدا ماگىستىرلىق ئاسپىرانتلىقىنى تاماملىغاندىن كېيىن پارىژ خەلقئارا ئۇنىۋېرسىتېتىدا دوكتورلۇق ئىلمىي ئۇنۋانى ئۈچۈن ئوقۇۋاتاتتى . ئىككى كۈندىن كېيىن ۋارىستىن جاۋاب خەت كەلدى . ئۇ خېتىدە بىز ئۈچۈن پارىژدىكى بىر خۇسۇسىي مېھمانخانىدىن ياتاق زاكاز قىلىپ قويغانلىقىنى ھەمدە ئۆزىنىڭ ۋاقىت چىقىرىپ بىزگە ھەمراھ بولىدىغانلىقىنى ئېيتىپتۇ . مەن يەنە ئۇنىڭغا رەھمىتىمنى بىلدۇرۇپ خەت يازدىم .
...
ئاپتوۋۇز تارچوق كوچىلاردىن ئۆتۈپ ، شەھەرنىڭ غەربىي تەرىپىدىكى قاتناش بېكىتىگە كېلىپ توختىدى . بىز يولۇچىلار بىلەن بىللە نەرسە - كېرەكلىرىمىزنى يىغىشتۇرۇپ ئاپتوبۇستىن چۈشتۇق . دېيىشكىنىزدەك ۋارىسجان بېكەتتە بىزنى ساقلاپ تۇرغان ئىكەن ، ئۇنى كۆرۈپ تولىمۇ خۇشال بولدۇق .
- ئەسسالام ، خۇش كەپسىلەر ، ھامىغانسىلەر !
- خۇداغا شۈكۈر ، تىنچ - ئامان كېلىۋالدۇق !
ۋارىسجان خۇش پېئىل ، ئوچۇق مىجەزلىك يىگىت ئىدى . ئىلگىرى شىنجاڭ ئۇنىۋېرسىتېتىنىڭ كومپىيۇتېر ئىلمى فاكۇلتېتىدا ماگىستىر ئاسپرانتلىقى بويىچە ئوقۇۋاتقىنىدا سىرتتىن تونۇشاتتۇق . بۇ يىل 5 - ئايدا ستوكھولمغا ئوينىغىلى بارغىنىدا بىللە بولغانىدۇق .
...
نېمىلەرنى ئويلاۋاتىسىز ، دەرياغا قاراپ جىمىپ كەتتىڭىزغۇ ؟
ۋارىسجاننىڭ ئاۋازى مېنى خىياللرىمدىن ئويغاتتى . مەن ئۇنىڭغا قاراپ كۈلۈپ قويدۇم - دە، ئۇنىڭدىن قايتۇرۇپ سورىدىم :
- بۇ دەريا قانچىلىغان كىشىلەرنىڭ تەسەۋۋۇرى ۋە ئىجادىيەت ئىلھامىنى قوزغىغاندۇ ؟ ئۆز دەۋرىدە بالزاك ۋە مۇپاسسانلار بىز تۇرغان مۇشۇ قىرغاقتا تۇرۇپ نېمىلەرنى ئويلغاندۇ ؟ مەن مۇشۇ تۇرقىدا ئلفونېس داۋدېتنىڭ << ئاخىرقى دەرس >> ناملىق ھېكايىسىنى ئويلاپ قالدىم .
- ھەي ، ئدەبىياتچى دېگەن ئادەتتىكى كىشىلەرگە ئوخشىمايدۇ - دە، - دىدى ۋارىسجان كۈلۈپ تۇرۇپ ، - مەن سىزنىڭ ھېسسىياتىڭىزنى چۈشىنىۋاتىمەن ، شەخسەن ئۆزۈممۇ پارىژغا دەسلەپ كەلگەن چاغلىرىمدا خۇددى سىزدەك ھېسسىياتتا بولغانىدىم . ھەممە نەرسىگە قىزىقىش ۋە ھاياجان ئىلكىدە قاراپ يۈرگەنىدىم . لېكىن پارىژنىڭ سۈر - ھەيۋىتى ۋە سەنئەت گۈزەللىكى بىلەن بىر ۋاقىتتا يەنە ئادەمنى يىغلىتىدىغان رەھىمسىز رېئاللىقىنىڭمۇ مەۋجۇتلىقىنى ئاستا - ئاستا چۈشىنىپ يەتتىم . ئۇنىڭ ئۈستىگە ئالدىراش ھايات رىتىمى ، تۇرمۇش ھەلەكچىلىكى ۋە ئۆگىنىدىغان نەرسىلەرنىڭ كۆپلۈكى مېنىڭ ىىيال سۈرىدىغان بوش ۋاقىتلىرىمنىڭ ھەممىسىنى يوق قىلدى . ھازىر مەندە ھەننىۋا پارىژلىقلارغا ئوخشاشلار كۆز ئالدىمدىكى شەھەر بوشلۇقىغا نىسبەتەن ئۇزاق مەزگىللىك كۆنۈشتىن شەكىللەنگەن بىر خىل بىپەرۋا كەيپىيات مەۋجۇت . لېكىن شۇنداقتىمۇ فرانسۇزلارغا ئوخشاش رومانتىكىلىقنى تامامەن ئۇنتۇپ كەتمىدىم .
كۈن كەچ بولۇپ قالغانىدى . ئۇپۇققا باش قويغان قۇياشنىڭ قىزغۇچ نۇرلىرى سېنا دەرياسىنىڭ تىنىچ يۈزىدە يالتىرىماقتا ئىدى . بىز ئورنىمىزدىن تۇرۇپ دەريا قىنىنى بويلاپ ماڭدۇق . پۇت - قوللىرىمىز ئارام تېپىپ خېلى ھاردۇقىمىز چىقىپ قالغانىدى . ۋارىسجان سائىتىگە قاراپ :
- ھازىر بىزنىڭ ئۇنىۋېرسىتېتقا بارايلى ، مېنىڭ ياتىقىمنى كۆرۈپ بېقىڭلار ، شۇ يەردە تاماق يېگەندىن كېيىن مەن سىلەرنى ئاپىرىپ قوياي . تاماق يېگەچ ئەتىكى پىلانىمىزنى سۆزلىشىۋالايلى ، - دېدى .
بىز ۋارىسجاننىڭ كەينىدىن ئەگىشىپ دەريا بويىدىن ئايرىلدۇق ، ئاندىن مېتروغا چۈشۈپ پارىژنىڭ شەرقىي تەرىپىگە جايلاشقان پارىژ خەلقئارا ئۇنىۋېرسىتېتىغا يېتىپ باردۇق . بۇ يەردە مەزكۇر ئۇنىۋېرسىتېتنىڭ چوڭراق بىر رايونى ئىدى . كەچلىك تاماقنى ئۇنىۋېرسىتېتنىڭ ئاشخانىسىدىن يېدۇق . ئاشخانا پاكىز ۋە ئازادە بولۇپ ، فرانسىيە ئۇنىۋېرسىتېتلىرىنىڭ جانلىق بىر كارتىنىسىدىن دېرەك بېرىپ تۇراتتى . ۋارىسجان بىلەن سۆزلىشىپ ئەتىكى پائالىيىتىمىز توغرۇلۇق كېلىشتۇرق . كۈندۈزدە ئۆزىمىز ئايلىنىپ مۇزېي ۋە ساياھەت نوقتىلىرىنى كۆرىدىغان بولدۇق . كەچقۇرۇن ۋارىسجاننىڭ يېقىن دوستى ژان دۇئال ئەپەندىنىڭ ئۆيىگە مېھماندارچىلىققا بارىدىغان بولدۇق .
...
دېگەندەك سائەت 5:00 بىلەن ۋارىسجان بىزنى ئالغىلى كەلدى . مېھمانسارايدىن چىقىپ ، يېقىن ئەتراپتىكى كوچىلارنىڭ بىرىگە كىردۇق . دۇكان ۋە ئاشخانىلار كۆپ قايناق بىر كوچا ئىدى . تۈركلەر ، جۇڭگولۇقلار ۋە ۋيېتناملىقلار ئاچقان دۇكانلار كۆزگە چېلىقىپ تۇراتتى . كوچا بويىدىكى زىچ سېلىنغان ئائىلىلىكلەر ئولتۇراق بىناسىنىڭ بىرىگە كىردۇق . بۇ ئاز دېگەندىمۇ بىر - ئىككى يۈز يىل بولغان كونا بىنا بولۇپ ، پەلەمپەي ۋە ئاسما چىراغلىرىدىن كىلاسسىك ياۋرۇپا بىناكارلىقىنىڭ ئۇسلۇبى چىقىپ تۇراتتى ھەمدە كىشىگە مۇستەھكەم تۇيغۇ بېرەتتى . ئىككىنچى دۇنيا ئۇرۇشىدىن بۇرۇن ئىشلەنگەن سىم تور بىلەن ئورالغان ئالاھىدە لىفىت بىلەن بەشىنچى قەۋەتكە چىقتۇق . بىز ئەزەلدىن بۇنداق ئۆزگىچە لىفىتنى كۆرۈپ باقمىغاچقا ھەممىمىز ھەيران قالدۇق . ژان دۇئال ئەپەندى ئىشىك ئالدىدا ساقلاپ تۇرغانىكەن ، بىزنى كۆرۈپلا راۋان ئۇيغۇر تىلىدا سالام بەردى :
- ئەسسالامۇ ئەلەيكۇم ! خۇش كەلدىڭىزلار ، مېھمانلار ، قېنى ئۆگە كىرىڭلار !
بىز ژان دۇئال ئەپەندى بىلەن قىزغىن قول ئېلىشىپ كۆرۈشتۇق . ئۇ پەسكە ئېڭىشىپ قىزىم بىلەن سۆزلەشتى :
- ھە ، ئۇيغۇرىيە قىز ، پارىژ قانداقكەن ، سىز بۇ شەھەرنى ياخشى كۆردىڭىزمۇ ؟
- سىز ئۇيغۇرمۇ ؟ - دەپ قايتىلاپ سورىدى قىزىم دۇئال ئەپەندىدىن - ئۇيغۇرچە سۆزلىيەلەيدىكەنسىزغۇ !
- شۇنداق مەن ئۇيغۇر ، - دېدى دۇئال ئەپەندى قاقاقلاپ كۈلۈپ ، - ئۇيغۇر بولغاندىكىن ئۇيغۇرچە سۆزلەيمەن - دە !
- ياق ! ... چوقۇم چاقچاق قىلىۋاتىسىز ، ئەمىسە ، نېمىشاق كۆزلىرىڭىز كۆپكۆك خۇددىي چەت ئەللىكلەردەك !
ھەممىمىز قىزىمنىڭ گېپىدىن كۈلۈشپ كەتتۇق . ژان دۇئال ئەپەندى يەنە قىزىم بىلەن قېرىشتى :
- قاراڭ قىزچاق ، فرانسىيىدە مەن چەت ئەللىك ئەمەس ، بەلكى سىلەر چەت ئەللىك ھىساپلىنىسىلەر ، شۇنداق ئەمەسمۇ ؟
- لېكىن ، لېكىن بىزنىڭ يۇرتىمىزدا سىزگە ئوخشاش سېرىق چاچ ، كۆزى كۆك ئادەملەرنى چەت ئەللىك دەيمىز ، سىز راستتىنلا چەت ئەللىك ئەمەسما ؟
- ئۇ دېگەن جۇڭگو - دە ، جۇڭگوغا بارساق ئەلۋەتتە بىزنى چەت ئەللىك دەيدۇ ، سىلەر بۇ يەرگە كەلسەڭلار بىز سىلەرنى چەت ئەللىك دەيمىز !
- ھە مۇنداق دەڭ ! ئەمدى چۇشەندىم ، سىز ئۆزىڭىز ئۇيغۇر ئەمەس ، لېكىن ئۇيغۇر تىلىدا ياخشى سۆزلىيەلەيسىز ، شۇنداقمۇ ؟
- شۇنداق ، توغرا دېدىڭىز ، ئەقىللىق قىزكەنسىز !
ژان ئەپەندى قىزىم بىلەن سوزلەشكەچ بىزنى مېھمانخانىغا تەكلىپ قىلدى . دۇئال ئەپەندىنىڭ ئۆيى پارىژغا نىسبەتەن چوڭ ھەم ئازادە ھېسابلىنىدىغان ئۆي ئىدى . ھۇجرا ئۆيلەر ئۇنچىلىك چوڭ بولمىسىمۇ ، لېكىن ئەپلىك ۋە يارىشىملىق قىلىپ لايىھلەنگەنىدى . ئۆي جاھازلىرى ۋە تۈرلۈك زىننەت بۇيۇملىرىدىن بۇ ئۆينى ئادەتتىكى تۇرالغۇ جاي دېگەندىن كۆرە بىر كىچىك مۇزېي دېيىش توغرا ئىدى .
- قېنى ئازادە ئولتۇرۇڭلار ، ئۆز ئۆيۈڭلەردەك ھېس قىلىڭلار ، مەن شىنجاڭغا كۆپ بارغان ، ئۇيغۇرلارنىڭ مېھماندوستلۇقىنى ئوبدان بىلىمەن ، بۈگۈن كەچلىك تاماقنى بۇ يەردە يەيمىز . ۋارىسجان بىلەن مەسلىھەتلىشىپ توخۇ قوردىقى قىلىدىغان بولدۇق ، سىلەر ئۈرۈمچىدە خەنزۇچە ئاتالغۇسى بويىچە << داپەنجى >> دەيدىكەنسىلەرغۇ !
-رەھمەت ، مەن ياردەملىشەي ، - دېدى ئايالىم ئورنىدىن تۇرۇپ .
- بوپتۇ ، ۋارىسجان بىلەن خانىم توخۇ قوردىقى قىلىشقا مەسئۇل بولسۇن ، بىز سۇلايمان ئەپەندى بىلەن بىردەم پاراڭلىشىۋالايلى .
ژان دۇئال ئەپەندى ئېگىز بوي ، گەۋدىلىك كىشى ئىدى ، ئۇنىڭ تولۇق ئىسمى راخمان ژال دۇئال بولۇپ ، ئۇ خەنزۇچىنى سۇدەك سۆزلەيتى . ئۆزىنىڭ ئېيتىپ بېرىشىگە قارىغاندا يىلدا نەچچە قېتىم ھۆكۈمەت ئىشى بىلەن جۇڭگوغا بېرىپ تۇرىدىكەن . بولۇپمۇ فرانسىيىنىڭ يۇقىرى دەرىجىلىك دۆلەت ئەمەلدارلىرى جۇڭگونى زىيارەت قىلغاندا دۇئال ئەپەندىمۇ خەنزۇ تىلى تەرجىمانى بولۇپ جۇڭگوغا كۆپ قېتىم بارغانىكەن . ئۇ ھەتتا بىر قېتىم كانادا زۇڭلىسىغا خەنزۇچە تىلى تەرجىمانى بولۇپ جۇڭگوغا بارغانىكەن . شىنجاڭغا 80 - يىللارنىڭ ئاخىرىلىرىدىن باشلاپ كۆپ قېتىم بارغان بولۇپ ، ئۇيغۇر مەدەنىيتىگە نىسبەتەن چوڭقۇر قىزىقىشى ۋە ئىشتىياقى بار ئىكەن . شۇڭلاشقا ئۇيغۇر تىلىنى ئۆزلۈكىدىن ئۆگىنىپ خېلى پۇختا ئىگىلەپتۇ . بولۇپمۇ ئۇيغۇرچە كىتاب - ماتېرىياللاردىن پايدىلىنىش سەۋىيىسى خېلى يۇقىرى ئىكەن ، لېكىن ئۇيغۇر تىلىدا داۋاملىق سۆزلەش مۇھىتى بولمىغاچقا ئادەتتىكى سالام - سەھەت سۆزلىرىدىن باشقا بىۋاسىتە سۆزلىشىشتە بىر ئاز قىينىلىدىكەن .
دۇئال ئەپەندى فرانسۇزلارغا خاس ئوچۇق - يورۇق ۋە يۇمۇرلۇق تۇيغۇغا باي كىشى ئىدى . ئۇنىڭ ھەر بىر جۈملە سۆزلىرىدىن يۇمۇر تۆكۈلۈپ تۇراتتى . بىز بىردەم ئىنگلىزچە ، بىردەم خەنزۇچە قىلىپ ئارىلاشتۇرۇپ سۆزلەشتۇق . مەن ھەتتا دۇئال ئەپەندىنىڭ خەنزۇچە تەلەپپۇزىنىڭ ياخشىلىقىدىن ئۆزۈمنى چېنىپ قالغاندەك ھېس قىلىپ قالدىم .
- مۇنداق قىلايلى ، تاماق پىشقىچە مەن سىلەرگە مېنىڭ بۇ كىچىك دۇنيايىمنى زىيارەت قىلدۇراي ، قېنى ، ئۇيغۇرىيە قىز ئۈستىگە چىقايلى .
قىزىم بىلەن ئىككىمىز دۇئال ئەپەندىنىڭ كەينىدىن ئگىشىپ ماڭدۇق . ئۇ ياندىكى كارىدورغا چىقىپ بىر بالداقنى تارتقانىدى ، ئۈستۈكى قەۋەتكە چىقىدىغان بىر يىغام پەلەمپەي پەسكە سىيرىلىپ چۈشتى . مەن شۇ چاغدىلا بۇ ئۆينىڭ ئۈستىدە يەنە بىر قەۋەت بارلىقىنى بىلدىم . ئولتۇراق ئۆيلەرنىڭ لايىھىلىنىشىدىكى بۇ خىل ئەپچىللىك ۋە قۇلايلىق مېنى ھەيران قالدۇردى . دۇئال ئەپەندىنىڭ كەينىدىن يىغما پەلەمپەي ئارقىلىق ئۈستىگە چىقتۇق . يائاللا ! كۆزلىرىم ئالىچەكمەن بولۇپ كەتتى ... پۈتۈن ئۈستۈنكى قەۋەت گويا بىر فولكلور ۋە سەنئەت مۇزېيىنىڭ ئۆزى ئىدى ! يەردە تۈرلۈك گىلەم - زىلچىلەر ، تامدا ھەر خىل ئەنئەنىۋى كىيىم - كېچەكلەر ، تۇرمۇش بۇيۇملىرى ، زىننەت ماتېرىياللىرى ، ئىشقىلىپ ئوتتورا ئاسىيا ۋە يىپەك يولى بويلاپ ياشىغان خەلقلەرنڭ ئەنئەنىۋى فولكلور ئۈلگىلىرىنىڭ ھەممىسى بار ئىدى .
مانا بۇ مېنىڭ كىچىك جەننىتىم . مەن ھەر قېتىم شەرققە ، بولۇپمۇ ئوتتۇرا ئاسىيا ۋە شىنجاڭغا بارغىنىمدا مۇشۇنداق قول ھۈنەر ۋە سەنئەت بۇيۇملىرىنى يىغىمەن ، ساقلايمەن ، ئۇلاردىن ھۇزۇرلىنىمەن . مەن شۇنداق ئادەم .
- مەن ئۆز كۆزۈمگە ئىشەنمەيلا قالدىم ، - دېدىم ئەتراپىمغا ھايرانلىق بىلەن قاراپ ، - پارىژغا كېلىپ دۇنياغا داڭلىق مۇزېيلاردىن باشقا يەنە سىزنىڭ ئۆيىڭىزدە بىزنىڭ يۇرتىمىزغا دائىر مۇنداق مەخپىي بىر فولكلور مۇزېيىنىڭ بارلىقى مېنى راستتىنلا ھەيران قالدۇردى . شۇنچە كۆپ ئەۋرىشكىلەرنى قاچانمۇ يىغىپ بولغانسىز ؟
- بۇ مېنىڭ قىزىقىشىم ، بۇلارنى خۇددىي چۈمۈلە توختىماستىن دان يىغقاندەك بىر تال - بىر تالدىن يىغىپ توپلىدىم . ھەر قېتىم ئوتتۇرا ئاسىياغا ، بولۇپمۇ شىنجاڭغا بارغىنىمدا كۆزلىرىم مۇشۇ نەرسىلەردىلا بولىدۇ . ئەمەلىيەتتە ئوتتۇرا ئاسىيالىقلار ، جۈملىدىن ئۇيغۇرلار سەنئەتكە ئەڭ باي خەلقسىلەر ، سىلەرنىڭ قولۇڭلار قەلەم توختىمىغان بىلەن ھۈنەر - سەنئەت تاشلانماي داۋاملىشىپ كەلگەن خەلقسىلەر . شۇڭلاشقا ئۆز دۇنيايىڭلارنى ھۈنەر - سەنئەت بۇيۇملىرى ئارقىلىق ئىپادىلەپ كەلگەنسىلەر .
...
دۇئال ئەپەندى يەنە بىر كىچىك ئۆيىدىكى ئەينەكلىك ئىشكاپىنى ئېچىپ كۆرسەتتى . بۇ ئىشكاپنىڭ ئىچى ئۇيغۇرلارنىڭ تۈرلۈك باش كىيىملىرى بىلەن تولغانىدى . ئۇنىڭدا شىنجاڭدىكى ھەر قايسى يۇرتلارنىڭ ئۆزىگە خاس بولغان ئەر - ئاياللار دوپپىلىرى ، تۇماقلار ، قۇلاقچىلار ، لېچەك - ياغلىقلار ، ھەتتا كېرىيىنىڭ كىچىك تەلپىكىگىچە رەتلىك تىزىقلىق تۇراتتى . ئىككىنچى ئىشكاپتا شىنجاڭدا ئىشلەنگەن يەرلىك پىچاقلارنىڭ تۈرلۈك نۇسخلىرى تىزىلغان ئىدى . ئۈچىنچى ئىشكاپتا شىنجاڭنىڭ ھەر قايسى جايلىرىدا ئىشلەنگەن ئەنئەنىۋى كىيىم - كېچەكلەر ، بولۇپمۇ كەشتە ۋە گۈل ئىشلەنگەن قويۇملۇق تونلار ئېسىلغانىدى . بۇلاردىن باشقا بۇ ئۆيدە يەنە ئاتا ۋە باشقا ئۇلاغلارنىڭ ئېگەر - جابدۇقلىرى ، تۈرلۈك قامچىلار ، خۇرجۇنلار ، مەسە - كالاچ ، پوتا - بەلۋاغ ، ھاۋانچا ، ئاپتۇۋا - چىلاپچا قاتارلىق تۈرلۈك - تۈمەن تۇرمۇش بۇيۇملىرى رەت - تېتى بىلەن تىزىلغان ئىدى . مەن بۇ نەرسىلەرنى كۆرۈپ شىنجاڭدىكى ھەر قانداق بىر فلكلور مۇزېيىدا ، ھەتتا شىنجاڭ ئۇنىۋېرسىتېتىنىڭ فولكلور مۇزېيىدىمۇ بۇنچىلىك بۇيۇملارنىڭ يوقلۇقىنى ھېس قىلدىم توۋا ، پارىژدا تۇرۇپ يۇرتىمىزنىڭ مەدەنىيەت ۋە فوكلور بايلىقلىرىنى كۆرۈش ، يەنە كېلىپ ئادەتتىكى بىر شەخسنىڭ ئائىلە مۇزېيىدىن بۇنچىلىك كۆپ نەرسىلەرنى كۆرۈش ھەر قانداق ئادەمنى ھاياجانغا سالمامدۇ !؟...

...
ۋاقىت خېلى كەچ بولۇ پكەتكەنىدى . بىز دۇئال ئەپەندى بىلەن خوشلىشىپ مېھمانسارايغا قايىتتۇق . ۋارىسجانمۇ ئۇنىۋېرسىتېتتىكى ياتىقىغا قايىتتى . ھاۋا تۇتۇلۇپ يەنە يامغۇر يېغىشقا باشلىدى . دۇئال ئەپەندىنىڭ لۇغىتى مېنىڭ خىياللىرىمنى خېلى ئۇزۇنغىچە ئۆز ئىلكىگە ئېلىۋالدى .
ئەتىسىدىن باشلاپ يەنە پارىژدىكى كۆرىدىغان جايلارنى ئايلىنىپ كۆردۇق . سودا سارايلارنى ھەتتا ئەتىر بازىرىنىمۇ ئايلىنىشقا ۋاقىت چىقاردۇق . پارىژدىكى بىر ھەپتىمىز ئەنە شۇنداق ئۆتۈپ كەتتى . 9 - ئاۋغۇست چۈشتىن كېيىن ستوكھولمغا قايتىدىغان بولغاچقا << ۋېينا >> سارىيىدىن ئەتىگەندىلا ھۋساباتىمىزنى ئۈزۈپ ، نەرسە - كېرەكلىرىمىزنى كۆتۈرۈپ چىقىپ كەتتۇق . دۇئال ئەپەندى نەرسىلىرىمىزنى ئۆز ئۆيىدە قويۇپ تۇرۇشىمىزنى ئېيىتتى . شۇ كۈنى دۇئال ئەپەندى بىزنى ئۆيى ئەتراپىدىكى بىر تۈرك رېستورانىدا مېھمان قىلدى . ۋارسجان ئاپتوبۇس بېكىتىگە قەدەر ىزنى ئاپىرىپ قويدى . ۋارىسجان بىلەن خوشلىشىدىغان چاغدا تۇيۇقسىزلا چېلەكلەپ قۇيغاندەك يامغۇر يېغىپ كەتتى . ھەمىمىمىز ھۆل بولۇپ كەتتۇق . بىز ئايرودرومغا بارىدىغان ئاپتوبۇسقا چىقىۋالغاندىن كېيىن ۋارىسجان چاقچاق قىلىپ بىز بىلەن خوشلاشتى :
- خەير ، قېرىنداشلار ، ئامان بولساق كۆرۈشەرمىز ، سىلەرنى پارىژ يامغۇر بىلەن كۈتۈۋېلىپ ، يەنە يامغۇر بىلەن ئۇزىتىپ قويىدىغان بولدى ! ...
ئاپتوبۇس قوزغالدى . بىز قول پۇلاڭلىتىپ بۇ ئاق كۆڭۈل يگىت بىلەن خوشلاشتۇق .يامغۇر تۇمانلىرى ئىچىدە ۋارسجاننىڭ گەۋدىسى كۆرۈنمەي قالدى .

[[i] بۇ يازمىنى ئاخىرقى قېتىم تەھرىرلىگۈچى: TwoSak ، ۋاقتى: 2008-1-5 18:56 [/i]]



Oyghan
يازمىلار: 139
تىزىملانغان ۋاقتى: دۈيشەنبە ئاپرىل 02, 2007 6:48 am
ئالاقىلىشىش:

يازما يوللاش تەرىپىدىن يوللانغان Oyghan » يەكشەنبە يانۋار 06, 2008 7:36 pm

ئەسسالامۇ ئەلەيلۇم ھۆرمەتلىك تورداشلار،

دوكتۇر ئەسەت سۇلايمان ئەپەندى ئائىلىسى بىلەن پارىژدا ساياھەت قىلغاندا ئۇلارغا ھەمراھ بولغانىدىم. ئەمما پېقىرنىڭ << ئۆزلۈك ۋە كىملىك >> ناملىق بۇ ساياھەت خاتىرىسىدە تىلغا ئېلىنىدىغانلىقىنى ئويلىماپتىمەن... ئەسەت سۇلايمان ئەپەندىنىڭ بۇندىن كېيىنكى تەتقىقات ئىشلىرىغا ئۇتۇق تىلەيمەن. ئاخىرىدا، فرانسىيەگە كېلىدىغان ھەر قانداق قېرىندىشىمىزنى قىزغىن قارشى ئالىدىغانلىقىمنى بىلدۈرۈمەن.

ئىنكاس يوللاش
[phpBB Debug] PHP Warning: in file [ROOT]/vendor/twig/twig/lib/Twig/Extension/Core.php on line 1275: count(): Parameter must be an array or an object that implements Countable
[phpBB Debug] PHP Warning: in file [ROOT]/vendor/twig/twig/lib/Twig/Extension/Core.php on line 1275: count(): Parameter must be an array or an object that implements Countable

گە قايتىش

توردىكى ئەزالار

مۇنبەردىكى ئەزالار: 1 ۋە 0 مېھمانلار